Cerita Rakyat

Ki Ageng Sela

Dhek jamane kraton Demak, ing bawah Grobogan ana wong kang jenenge Ki Ageng Sela. Ki Ageng kuwi wes kawentar sekti banget. Dene pegaweane saben dina nggarap sawahe, nandur pari, palawija, lan liya-liyane. Kocapa nuju sawijining dina, kaya adat sabene, Ki Ageng Sela lagi macul ana sawah. Ing wektu iku mendhunge nggameng lan banjur wiwit grimis riwis-riwis. Ki Ageng terus wae olehe macul. Ora anatara suwe ing kono ana wong kaki-kaki teka, njur arep nyedhaki nggone Ki Ageng mau. Ning Ki Ageng wis waspada, ngerti yen kuwi dudu sabaene uwong, basan wus cedhak, kaki-kaki mau durung nganti bisa apa-apa, weruh-wweruh wis dicekel karo Ki Ageng.

Lha ngertia cah, bareng wong kaki-kaki mau dicekel, kuwi rak banjur kroncalan, malik rupane dadi nggegirisi. Rupane kuwi banjur malik dadi ula, ning gedhe tur untune njrengangah, dawa-dawa nganggo sungut. Wah medeni, lha wong kaki-kaki kok njur malih rupa dadi kaya ngono. Lha ngertia cah, sejatine sing dicekel Ki Ageng Sela kuwi bledheg. Sok nyamber uwong, nek kena ya bisa mati. Mulane, bocah-bocah yen udan aja sok dolanan ana njaba. Mengko nek kamiran kyai bledheg, pie, wedi ora? Nutugake dongenge mau, sing tak kandhakake wong kaki-kaki mau, sing nyedhaki Ki Ageng Sela, kuwi mau sejatine Kyai Bledheg sing memba-memba dadi wong tuwa, karepe ben ora ketara, arep nyamber Ki Ageng Sela.

Ning sarehning Ki Ageng Sela mau wong sekti, mula malah wis weruh sakdurunge, dadi bledheg durung bisa apa-apa, malah wis dicekel kuwi mau. Bledheg dicekel kuwi njur ora duwe daya, wose kalah prebawa karo Ki Ageng Sela. Saiki karepe Ki Ageng Sela bledheg kuwi arep diaturake menyang ratu Demak, ia Knjeng Sultan Bintara. Tenan bledheg ditampa dening Kanjeng Sultan, lan didhawuhi ndokok ana krangkeng wesi, diseleh ana ngalunalun. Wah la kocapa, wong ndelok kuwi rak ora karuan akehe, ndalidir saka ngendi-endi, saka ndesa-ndesa adoh ya pada teka, perlu ndelok bledheg kuwi mau. Kanggo pangeling-eling Kanjeng Sultan iya dhawuh marang abdi juru sungging (tukang gambar), didhawuhi nggambar bledheg kuwi kanggo rerenggan mesjid Demak. Wah cekake ing ngalun-alun Demak kono banjur rame dadakan kaya nek inuju ana kramean Grebeg Maulud utawa Grebeg Besar.

Kocaa ing antarane wong-wong sing padha nonton kono ana siji, wujude wong nini-nini wis tuwa banget. Kuwi rak ya kepengin arep ndelok. Tekane mrono karo nggawa bathok isi banyu. Sarehne sing ndeleng kuwi akeh banget, dadi nini-nini mau ya mesakake, ngesak-esuk pijer kontal, malah diusek uwong pirang-pirang, ora bisa nyedhak, lan ora bisa weruh, ning kok ya nekad wae, kadereng olehe weruh bledheg, diesuk wong akeh meksa ora gelem ngalah, pijer bali ndhesel ana ngarep. Saking tlatene, suwening-suweya bisa klakon tekan ngrep cedhak caket karo krangkeng, dadi bisa weruh nyata. Ning kocapa jebuleora kepingin bisa weruh wae. Basan wis cedhak, ora kanyana-nyana, jebulbanu sing ana bathok banjur disiratake neng kerangkeng.

Gleger dheeerrrrr, mengkono suwara sing kerungu seru banget. Wong-wong suwara sing kerungu seru banget. Wong-wong pirang-pirang ora weruh nalare, weruh-weruh krangkeng wesi banjur mbledhos dadi sawalang-walang. Bledheg sing dikunjara wis ilang bali menyang asale. Sing ndelok kono pating jlerit bingung bilulungan. Akeh uga sing ketaton lan kesangsaran. Lha ngertia cah, nini-nini kuwi mau, sejatine Nyai Bledheg, bojone Kyai Bledheg sing dicekel Ki Ageng Sela. Dadi tekane mrono mau mula are nulung kyaine supaya bisa luar saka krangkeng. Carane nganggo disirati banyu, sebab bledheg kuwi urie uga ana banyu, ning ora banyu kali utawa segara, banyune banyu ngawang-awang, yakuwi sing diarani udan. Hara nek ketiga kae sarehne ora ana bledheg. Bledheg ngalih nang tanah utawa negara liya sing ana udan.

Lha mengkono dongenge Ki Ageng Sela olehe nyekel bledheg. Banjur keriye kahanane ing Demak mau. Aku mau kandha yen Kanjeng Sultan dhawuh, suaa bledhege wis ucul, dadi gambare ya durug dadi. Sing wis bisa digambar lagi endhase karo gulu sethithik. Lha gambar kuwi ya meksa ditempleke ing gebyoke mesjig Demak. Seprene yen wong kepengin ndeleng ya bisa mbuktekake ana mesjid Demak. Sateruse kepriye lelakone Kai Bledheg , nalika semana Bledheg kuwi njur kanji, wedi banget karo Ki Ageng Sela dalah saturun-turune. Mulane serene, yen pinuju mendhung utawa grimis, banjur ana cleret mak byar, wong-wong banjur padha nyebut, ngucapake mangkene “I Gandrik, utrane ki Ageng Sela”. Nek wong wis bisa ngucapke mengkono kuwi, mesthi slamet ora disamber bledheg, jalaran bledhege wedi, wong sing ngucapake mau diarani anake Ki Ageng Sela.